2-வது ஒருநாள் போட்டி : இலங்கைக்கு எதிரான போட்டியில் இங்கிலாந்து அபார வெற்றி

இலங்கைக்கு எதிரான 2-வது ஒருநாள் போட்டியில் இங்கிலாந்து அணி 10 விக்கெட் வித்தியாசத்தில் அபார வெற்றி பெற்றுள்ளது. முன்னதாக டாஸ் வென்ற இலங்கை அணி முதலில் பேட்டிங்கை தேர்வு செய்தது. இதனையடுத்து களமிறங்கிய இலங்கை அணி நிர்ணயிக்கப்பட்ட 50 ஓவர்களில் 7 விக்கெட்டுகளை இழந்து 254 ரன்கள் எடுத்தது. இலங்கை அணியில் தரங்கா 53, சண்டிமால் 52, மேத்யூஸ் 44 ரன்கள் எடுத்து ஆட்டமிழந்தனர். இங்கிலாந்து பந்துவீச்சில் பிளங்கட், ரஷித் தலா 2 விக்கெட் வீழ்த்தினர். 

255 ரன்கள் எடுத்தால் வெற்றி என்ற இலக்குடன் களமிறங்கிய இங்கிலாந்து அணி 34.1 ஓவர்களில் விக்கெட் இழப்பின்றி 256 ரன்கள் எடுத்து 10 விக்கெட் வித்தியாசத்தில் அபார வெற்றி பெற்றது. இங்கிலாந்து அணியில் தொடக்க வீரர்களான ஹேல்ஸ், ஜேசன் ராய் சதமடித்து அசத்தினர். ஹேல்ஸ் 133, ஜேசன் ராய் 112 ரன்கள் எடுத்து இறுதிவரை ஆட்டமிழக்காமல் இங்கிலாந்து அணியின் வெற்றிக்கு வழிவகுத்தனர். 5 ஒருநாள் போட்டிகள் கொண்ட தொடரில் முதல் போட்டி டையில் முடிந்தது குறிப்பிடத்தக்கது.