கால்பந்தில் உலக கோப்பை போட்டிக்கு அடுத்தபடியாக அதிக ரசிகர்களை கவருவது ஐரோப்பிய (யூரோ) கோப்பை போட்டியாகும். ஐரோப்பிய கண்டத்தை சேர்ந்த நாடுகள் மட்டும் பங்கேற்கும் இந்த போட்டி 1960–ம் ஆண்டு முதல் 4 ஆண்டுகளுக்கு ஒரு முறை நடத்தப்பட்டு வருகிறது.
இதன்படி 15–வது ஐரோப்பிய கோப்பை கால்பந்து போட்டி பிரான்ஸ் நாட்டில் வெள்ளிக்கிழமை முதல் ஜூலை 10–ந் தேதி வரை 31 நாட்கள் நடக்கிறது. அங்குள்ள 10 நகரங்களில் இந்த போட்டி அரங்கேறுகிறது.
24 அணிகள் பங்கேற்றுள்ள இந்த போட்டித்தொடரில் 6 பிரிவாக அணிகள் பிரிக்கப்பட்டுள்ளன. ஒவ்வொரு பிரிவிலும் 4 அணிகள் இடம் பெற்றுள்ளன. லீக் முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் 2–வது சுற்றுக்கு தகுதி பெறும்.
நேற்றைய தொடக்க ஆட்டத்தில் போட்டியை நடத்தும் பிரான்ஸ் - ருமேனியா (ஏ பிரிவு) அணிகள் மோதின. இதில் 2 முறை சாம்பியனான பிரான்ஸ் 2–1 என்ற கோல் கணக்கில் வெற்றி பெற்றது.முதல் பாதி ஆட்டத்தில் இரு அணிகளும் கோல் எதுவும் போடவில்லை. 57–வது நிமிடத்தில் பிரான்ஸ் வீரர் ஆலிவர் கிரவுட் கோல் அடித்தார். 65–வது நிமிடத்தில் ருமேனியா பதில் கோல் அடித்து சமன் செய்ய ஸ்டான்சு பெனால்டி மூலம் இந்த கோலை அடித்தார்.ஆட்டம் முடிய 1 நிமிடம் இருந்த போது பிரான்ஸ் 2–வது கோலை அடித்து வெற்றி பெற்றது. 89–வது நிமிடத்தில் டிமிட்ரி பேயட் இந்த கோலை அடித்தார்.
இன்று நடைபெறும் ஆட்டங்களில் அல்பெனியா– சுவிட்சர்லாந்து (ஏ பிரிவு) வேல்ஸ்– சுலோவாக்கியா, இங்கிலாந்து– ரஷியா (பி பிரிவு) அணிகள் மோதுகின்றன.
